कौन ह जितही,कौन ह हार ही

 एग्जिट पोल ह आगे है। जतेक चैनल ओतेक बात।कोनो चैनल कहिथे फलाना पार्टी जीतत है कोनो चैनल कहीथे फलाना पार्टी जीतत है। कोनो चैनल बतात है कि आदमी मन फलाना पार्टी ल वोट दे हे कोनो चैनल बतात हे ओरत मन फलाना पार्टी ल वोट दे हे। कोनो बतात हे युवा मन खिसियाए रहीन ए कारन ले वोट दे हे तो कोनो बतात हे जातिवाद चले हे।।कोनो बोलत हे विकास के मुद्दा में वोट डले हे तो कोनो बतात हे कि धान के नाम वोट डले हे। कोनो बोलत हे धरम के आंधी हे।

 हमर राज छत्तीसगढ़ म दू बने बड़का पार्टी हे कांग्रेस अऊ भाजपा। दू तीन अऊ पार्टी हे लेकिन ओ मन के जोर बहुत कम है।एक नवा पार्टी भी उतरे हे मैदान मे लेकिन जोर नई दिखत हे। कई जगह बागी मन भी खड़े हे ए मन अपन पार्टी के प्रत्याशी ल कतेक नुकसान पहुंचाही ये बात 3दिसंबर के पता चलही।

 एग्जिट पोल वाले मन राज के दूनो पार्टी के दिल के धड़कन ल बढ़ा दे हे। चैनल वाले मन के बात ल टाइम काटे बर मान लेथन तो एक पार्टी के 40- 50 प्रत्याशी जीतत हे अऊ दुसर पार्टी के 36- 46प्रत्याशी जीतत हे। अन्य पार्टी के 3-4झन के भी जीते के संभावना हे।

 दूनो पार्टी के प्रत्याशी मन के नींद उड़गे हे। कौन ह निपटत हे कही तै तो नहीं? ये प्रश्न एक जगह इकट्ठा प्रत्याशी मन में दुसर ले पूछत हे। अकेला होथे तो खुदे ल पूछथे, दुसर ले का पूछथ हे बे, तहु हार सकत हस। पार्टी के बड़े नेता मन ह अकेला म लिस्ट के बैइठे हे ।कोर जितही, कोन हारही, यहु देखत हे कि कोन ल हारना चाहिए। अबड़ 

 आग मूते हे साले ह। अपन आदमी के अलग लिस्ट बना के रखे हे कई झन। ए दरी एला आगे करहु अबड साथ दे हे ए ह जितही तो कोंटा में लगाहू । यहू डर सतात हे कि दिल्ली वाले मन ह का करिही।आजकल चतुरा होगे हे कई झन सीधा दिल्ली ले नाम जुड़वा लइथे।

 जहा एक पार्टी एक राज म बढ़त दिखत हे वो ह दुसर राज में हारत दिखत हे तो दूनो पार्टी वाले मन बोलत हे कि एग्जिट पोल में इहा विश्वास हे वहां विश्वास नई हे। सबो ल अपन चिंता सतात हे।दुसर राज में हारे जीते ले मोला कोनो फायदा नई हे।

अब दू रात के बात हे ओकर बाद दूध के पानी होहि या दूध के दूध पता चल जाहि लेकिन हरइया पार्टी ह का कही -

हमला जनादेश स्वीकार हे।

एला लोकतंत्र के खूबसूरती घलो कहीथे।